О, како е добро да си глуп

НАСЛОВ: О, како е добро да си глуп

Жанр: ептен ужасно трагична драма во два чина со радиоактивни последици по нашиот образовен систем.

Чин први.

Кабинет, полагање испит, јунска сесија, 23-годишна студентка и професорот

професорот: Ајде колешке ако веќе заглавивте на ова прашање, барем кажете кој настан во Македонија е еквивалент на југословенскиот 4-ти јули.

студентката: ????

професорот: Колешке ве молам сконцентрирајте се. Што празник е 11-ти октомври?

студентката: (молчи со наведната глава и нешто мрмори во себе, демек како да размислува)

професорот: (кулира) Колешке ви се молам. Што се случило на 11-ти октомври?

студентката: (упорно молчи)

(по минута – две исчекување студентката упорно молчи)

професорот: (сега веќе проклето кул) Колешке ве молам индексот. (го зема индексот и пишува 6. Со повисок тон, сите да чујат) Колешке ви пишав 6. Ама после испитов правете се како да не ме познавате. За дипломска кај мене воопшто немојте да размислувате, а кога ќе ме видите во ходник немојте ниту да ме поздравувате. Јас ќе ја вртам главата од вас и вие од мене.

Епилог.

Студентката по неколку години дипломира и сега е професор по историја вработена во училиште.

Чин втори.

Слушална 1, полагање испит по Помошно историски науки, надвор се разврнал ситен априлски дождец (како сега да го гледам), полна слушална со студенти и професор (за жал сега веќе покоен).

професорот: Ајде колега влечете прашање.

студентот: (влече од туцето ливчиња)

професорот: Колега, кое прашање го извлековте.

студентот: Мухамеданската ера и лунарниот календар

професорот: Ако е јасно прашањето ве молам почнете со одговарање. Како се пресметува лунарната година?

студентот: Лунарната година е еден астролошки феномен. Секоја година сонцето и месечината се судираат. Од тој судир се прават честици врз основа на кои се пресметува лунарната година.

професорот: (зачудувачки смирен со доза на неверие) Какооо?!? Како – како?!? Уште еднаш колега ќе ве молам повторете што е лунарна година? (му играат мускулите на лицето, се напрега да го чуе)

студентот: Како што веќе кажав тоа е астролошки феномен кога месечината и сонцето се судруваат, а преку нивните честици се одредува лунарната година.

професорот: (почнува прво пригушено, а потоа урнебесно да се смее. Престанува, па пак почнува да се смее. Почнува да кашла од смеење. Станува од столчето и ги вади наочарите. Го зема индексот и пишува 5. Потоа буквално го фрла индексот кон студентот) Колега засекогаш завршивте со мене. Ако сакате да го положите испитот ќе мора да одите пред комисија. Со мене завршивте. Толку беше.

студентот: (излегува од просторијата и пред другите колеги прашува) Зошто ме бутна? Па дури не ме остави ниту да завршам со одговорот. Ќе се жалам кај деканот.

Епилог.

Студентот проаѓа пред комисија, дипломира, а потоа и магистрира. Денес е магистер по историски науки.

Наместо заклучок: Сите оние за кои се крстевме како успеваат да положат, кои не знаеа да направат разлика меѓу регал и регент, кои не знаеа што празник е 11-ти октомври и сл., најголемиот дел од нив веднаш по дипломирањето најдоа работа по струка. Денес се професори, наставници, па дури и новинари, а благодарение на тоа што имале „дебели вези“ у министерство, биле со „книшки“ или биле нечии дечиња.. Едниот од нив, нема да ме чуди, дури ако го прочитам и како припадник на Фабрика. Секоја чест на исклучоците - еден или два. Но една – две ластовички пролет не носат.

За крај цитат од еден рокер са севера: „О КАКО ЈЕ ЛЕПО БИТИ ГЛУП“.